இலங்கையில் கண்டுபிடிக்கப்பட்ட இஸ்லாமிய மட்பாண்டங்களின் வகைகளும் பண்புகளும்

கற்காலத்தின் (நியோலிதிக் காலம்) இறுதிக் காலகட்டங்களில் மனிதன் முதலில் மட்பாண்டங்களை உருவாக்கத் தொடங்கினான். வேட்டையாடி உணவு சேகரிக்கும் நிலையிலிருந்து விடுபட்டு, உணவு உற்பத்தி செய்யும் பொருளாதார மாற்றத்தின் போது மட்பாண்டத்தின் தேவை எழுந்தது. தானிய உற்பத்திக்கு தானியங்களைச் சேமித்து வைப்பதற்கும், தண்ணீர் சுமந்து செல்வதற்கும், உணவு சமைப்பதற்கும், பரிமாறுவதற்கும் மட்பாண்டங்கள் பயன்படுத்தப்பட்டன. பிசுபிசுப்பான ஈரக் களிமண்ணை எரித்தால், அது கடினமாகவும், உடையக்கூடியதாகவும் மாறும் என்பதைக் கண்டறிந்தனர். மேலும் பரிசோதனையில், களிமண்ணை கூடுதல் வெப்பமேற்றினால், சமையலுக்கு ஏற்ற வகையில் பாத்திரங்களை உருவாக்கலாம் என்பதையும் கண்டறிந்தனர். பொதுவாக மட்பாண்டங்களின் உற்பத்தி மற்றும் மட்பாண்டங்களைச் சுடுதல் என்பது நெருப்பினை  அடிப்படையாகக் கொண்ட தொழில்நுட்பமாகவே கருதப்படுகின்றது (ஜெஸ்மில்,2024). பின்னர் உலை அடிப்படையிலான உலோகவியலாக மாறியது.

இலங்கையில் தொல்பொருள் அகழ்வாராய்ச்சியில் கண்டுபிடிக்கப்பட்ட மிக முக்கியமான கலைப்பொருட்களாக மட்பாண்டங்கள் உள்ளன. இலங்கையில் சுமார் 150 வருடங்களாக மேற்கொள்ளப்பட்ட தொல்பொருள் ஆய்வுகளில் நூற்றுக்கணக்கான பானைகள் முழுமையான வடிவிலும் உடைந்த துண்டுகளாகவும் கண்டுபிடிக்கப்பட்டுள்ளன (De Silva, Dissanayake, 2008). இவை பல அருங்காட்சியகங்களில் காட்சிப்படுத்தப்பட்டுள்ளன. இலங்கையில் மட்பாண்டங்கள் செய்வதற்கு ஏற்ற களிமண், நாடு முழுவதும் கிடைக்கப்பெற்றதால், மட்பாண்டங்கள் பாரம்பரியக் கைவினைப்பொருட்களாக இருந்து வருகின்றது. களிமண் பானைகளை உற்பத்தி செய்வது மக்களின் வாழ்வாதாரமாகவும் இருந்து வருகிறது. மட்பாண்டங்களைத் தயாரிப்பதற்கான பாரம்பரியச் சக்கரத்தைப் பயன்படுத்தியும், அவற்றைச் சுடுவதற்கான எளிய சூளையைச் செயல்படுத்தியும் உற்பத்தி நடவடிக்கையில் ஈடுபட்டு வந்தனர்.

இலங்கையில் மட்பாண்ட உற்பத்தி 4000 ஆண்டுகள் பழமையான வரலாற்றைக் கொண்ட பாரம்பரியக் கைவினைத் தொழிலாக இருந்தாலும், இலக்கிய ஆதாரங்களில் அவற்றைப் பற்றிய குறிப்பு மிகக் குறைந்த அளவிலேயே காணப்படுகிறது. ஆனால் தீவின் பல்வேறு பகுதிகளில் மேற்கொள்ளப்பட்ட தொல்பொருள் அகழ்வாராய்ச்சி ஆய்வுகளில் இலங்கையின் மட்பாண்டங்கள் குறித்த பரவலான விடயங்களை அறிந்துகொள்வதற்கு முடியுமாகவுள்ளது. இலங்கையில் பல்வேறு காலகட்டங்களில் செய்யப்பட்ட மட்பாண்ட உற்பத்திகளின் தரம் மற்றும் முறை, கலைவடிவம், அச்சுப்பொறிப்புகள், விநியோகம், பயன்பாடு, வர்த்தகம் மற்றும் உற்பத்தி தொழில்நுட்பம் ஆகியவற்றைத் தெரிந்துகொள்வதற்கு இத்தொல்பொருள் ஆய்வுகள் துனைபுரிகின்றன. மட்பாண்டத் தொழில் இலங்கையில் தொடர்ச்சியான குடிசைக் கைத்தொழிலாக இருந்ததுடன், இங்கு பரந்துபட்ட மட்பாண்டக் கைவினைக் கிராமங்களும் காணப்பட்டன. ஒவ்வொரு வீட்டிலும் சமையலறைகளில் தேவைப்படும் பொருளாக காணப்பட்டதால் அநேகர் மட்பாண்டத் தயாரிப்பில் ஈடுபட்டு இருந்ததையும் அவதானிக்கக் கூடியதாக உள்ளது (De Silva, Dissanayake, 2008). மட்பாண்டங்கள் இலங்கை வரலாற்றின் காலவரிசைப்படியான விடயங்களை ஒழுங்குபடுத்தி ஆராயும் கைவினைப்பொருட்களாகவும் இருந்து வருகின்றன.

நாட்டில் உற்பத்தி செய்யப்பட்ட பலவகையான மட்பாத்திரங்களுக்கு மேலதிகமாக, வட இந்தியா, தென்னிந்தியா, மத்திய கிழக்கு, ரோம் மற்றும் சீனாவிலிருந்து கடல் வர்த்தகம் மூலம் இறக்குமதி செய்யப்பட்ட பல மட்பாண்டங்களும் இலங்கையில் கிடைக்கப்பெற்றன. வட இந்தியாவின் செல்வாக்கினால், அனுராதபுரம் மற்றும் மாகம போன்ற பகுதிகளில் உற்பத்தி செய்யப்பட்ட கருப்பு பொலீக்ஷ் செய்யப்பட்ட பொருட்கள், பல மௌரியர் கால மட்பாண்டங்கள், ரோமன் மட்பாண்டங்கள், சீனப் பாத்திரங்கள், மற்றும் ஆரம்பகால கருப்பு மற்றும் சிவப்புப் பாத்திரங்களும் கண்டுபிடிக்கப்பட்டுள்ளன. இவை இலங்கையுடன் பிற நாடுகள் கொண்டிருந்த வர்த்தகச் செல்வாக்கிற்கு ஆதாரமாக உள்ளன.

இஸ்லாத்திற்கு முற்பட்ட காலத்திற்குரியதும் இஸ்லாமியக் காலத்திற்குரியதுமான பளபளப்பான மட்பாண்டங்களும் இலங்கைத் தீவில் அனுராதபுரம், மாந்தை, கந்தரோடை, குருந்தூர் மலை ஆகிய பல்வேறு பகுதிகளிலும் கண்டுபிடிக்கப்பட்டுள்ளன. இஸ்லாமிய மட்பாண்டங்களின் அழகான மாதிரிகள் அதிகளவாக மாந்தையிலேயே கிடைக்கப்பெற்றன. பல்வேறு வடிவமைப்புகளைக் கொண்டு வர்ணம் பூசப்பட்ட இஸ்லாமிய மட்பாண்டங்கள் என்றும் தனித்துவமானவை. இஸ்லாமியக் காலத்திற்கு  முந்தைய காலத்திற்குரிய அரேபிய மட்பாண்டங்களின் அலங்காரங்கள், இஸ்லாமியக் காலத்திலும் சுமார் நான்கு நூற்றாண்டுகள் வரை நீடித்தன (Ghafur, 1966).

உமய்யத் காலத்தில் முஸ்லிம்கள் சிந்துவில் உறுதியாகக் குடியேறியபோது, இஸ்லாமிய உலகம் சிந்துவிலிருந்து ஸ்பெயின் வரை பரவியிருந்தது. இலங்கையில் இஸ்லாத்திற்கு முந்தைய பாரசீகக் காலத்திற்குரிய பீங்கான்கள் ஒரு குறிப்பிட்ட அளவிற்கு கண்டுபிடிக்கப்பட்டுள்ளன. இஸ்லாம் தோன்றிய பின்னர் படிப்படியாக, புதிய வகையான இஸ்லாமிய மட்பாண்டங்களும் இலங்கையில் கண்டுபிடிக்கப்பட்டன. அவை சிந்து மற்றும் பிற பிராந்தியங்களில் உள்ள சமகால இஸ்லாமியக் குடியேற்றங்ளையும் வர்த்தகரீதியான தொடர்புகளையும் காட்டுகின்றன. 

இஸ்லாமிய உலகம் சீனாவிலிருந்து இறக்குமதி செய்யப்பட்ட பல்வேறு வகையான அலங்கார மட்பாண்டங்களையும் உபயோகப்படுத்தின. இதுதவிர உள்நாட்டில் தயாரிக்கப்பட்ட மெருகூட்டப்பட்ட ஜாடிகள் (glazed jars), கிராஃபியாட்டோ (sgraffiato wares) மட்பாண்டங்கள், பளபளப்பான மெருகூட்டப்பட்ட மட்பாண்டங்கள் (luster glaze) மற்றும் சீனப் பீங்கான் (Chinese porcelain), celadon and stone wares ஆகியவை இஸ்லாமிய மட்பாண்ட வகைகளில் சிறப்புமிக்கவையாகும். இவை இஸ்லாமிய உலகின் தனித்துவமிக்க மட்பாண்ட வகைகளாகும்.

அல்குலைன் மெருகூட்டப்பட்ட மட்பாண்டம் (Alkaline Glazed Pottery) 

அடர்த்தியான நீல மற்றும் பச்சை நிற மெருகூட்டப்பட்ட மேற்பரப்பைக் கொண்ட மெருகூட்டப்பட்ட ஜாடிகளின் தோற்றம் இஸ்லாத்தின் வருகைக்கு முன்னர் ஈரான் மற்றும் மெசொப்பொத்தேமியாவில் முந்தைய சசானிய காலத்தில் இருந்தது. வெளிப்புற மேற்பரப்பில் நீல-பச்சை நிற மெருகூட்டலின் தடிமனான பூச்சுக் கொண்ட குமிழி வடிவ பாத்திரங்களின் தடிமனான மற்றும் கனமான உடலால் இந்தப் பொருட்கள் வகைப்படுத்தப்படுகின்றன. வழக்கமாக, மையக்கருத்துகள், திராட்சை கொத்துகள், அலை அலைக் கோடுகள் மற்றும் வட்டங்கள் போன்ற குறைந்த வடிவங்களைக் கொண்டு காணப்படுகின்றன.

இத்தகைய ஜாடிகளின் கழுத்தில் மூன்று வளையக் கைப்பிடிகள் உள்ளன. அவை அலங்கார உருவங்களை மூன்று அலகுகளாகப் பிரிக்கின்றன. அனுராதபுரத்தில், 8 ஆம் நூற்றாண்டின் முற்பகுதியிலிருந்து குறைந்தது 13 ஆம் நூற்றாண்டு வரையான காலப்பகுதிக்குரிய இஸ்லாமிய மட்பாண்டங்கள், 1982 ஆம் ஆண்டு அபயகிரிய விகாரத்தைச் சூழ்ந்த பகுதிகளில் நடத்தப்பட்ட தொல்பொருள் அகழ்வாய்வுகளில் கண்டுபிடிக்கப்பட்டுள்ளன (Mughal, Mohammad Rafique,1 992). இதே போன்ற மட்பாண்டங்கள் ஆசியா, ஆபிரிக்கா, தென்கிழக்கு ஆசியா, கிழக்கு சீனா, ஜப்பான் போன்ற பல இடங்களிலும் கண்டுபிடிக்கப்பட்டுள்ளன. 

கிராபியாட்டோ மெருகூட்டப்பட்ட மட்பாண்டம் (Sgraffiato Glazed Pottery)

கி.பி. 9 ஆம் மற்றும் 11 ஆம் நூற்றாண்டுகளைச் சேர்ந்த, எகிப்து மற்றும் ஈரானிலிருந்து இறக்குமதி செய்யப்பட்ட அப்பாஸிட் கால மெருகூட்டப்பட்ட மட்பாண்டங்கள், இலங்கை மற்றும் உலகின் பிற வர்த்தக மையங்களுக்கிடையேயான இணைப்புகளுக்கான முக்கிய ஆதாரமாக அமைகின்றன. இம் (Sgraffiato Glazed Pottery) மட்பாண்டங்கள் பல வண்ண வடிவமைப்புகளுடன் மெருகூட்டப்பட்ட அலங்கார நுட்பங்களைக் கொண்டவை. இவை கி.பி 800 இல் மத்திய கிழக்கை அடைந்த சீன டாங் வம்சத்தின் (கி.பி 618-906) மட்பாண்ட வடிவமைப்பின் செல்வாக்கால் ஈர்க்கப்பட்டன. கி.பி எட்டாம் நூற்றாண்டின் முதல் பாதியில் இருந்தே டாங் வம்சத்தினர் பச்சை, அம்பர் மற்றும் நீல வர்ணங்களை உபயோகப்படுத்தினர். இது அலங்காரவடிவம் மற்றும் மேற்பரப்பு அலங்காரத்தில் முஸ்லீம் குயவர்களை மிகவும் கவர்ந்தது. இதன் தாக்கம் மிக விரைவாக இஸ்லாமிய உலகம் முழுவதும் வியாபித்தது. இலங்கையில் காணப்படும் மெருகூட்டப்பட்ட மட்பாண்டங்கள் இஸ்லாமிய உலகத்துடனான சீனத் தொடர்புகளின் விளைவாகும். இவை ஈரான் மற்றும் துருக்கிஸ்தானில் உள்ள பல இடங்களிலிருந்தும், சமர்கண்டிற்கு அப்பாலும் கூட காணப்பட்டுள்ளன. ஈராக்கில் இவை சமர்ரா, பஸ்ரா மற்றும் குஃபா போன்ற  இடங்களில் காணப்படுகின்றன. எகிப்தில், பொஸ்டாட் (Fostat) மற்றும் பொயும் (Fayyum) போன்ற பகுதிகளில் கி.பி பதினோராம் நூற்றாண்டுவரை கிராஃபியாட்டோ (sgraffiato) பொருட்கள் பயன்படுத்தப்பட்டதற்கான சான்றுகள் கிடைக்கப்பெற்றுள்ளன (Mughal, Mohammad Rafique,1986). கிழக்கு ஆபிரிக்க கடற்கரையில், கிராஃபியாட்டோ பொருட்கள் பதின்மூன்றாம் நூற்றாண்டு வரை பிரபலமான வர்த்தகப் பொருட்களாக இருந்தன. பஹ்ரைனில் சுமார் எட்டாம் நூற்றாண்டுக் காலப்பகுதிகளில் இதே போன்ற பொருட்கள் அகழ்வாராய்ச்சிகள் மூலம் கண்டுபிடிக்கப்பட்டுள்ளன.

பளபளப்பான மெருகூட்டப்பட்ட மட்பாண்டம் (Luster Glazed Ware)

உமய்யத் காலத்தின் ஆரம்பகால இஸ்லாமிய பளபளப்பான மெருகூட்டப்பட்ட மட்பாண்டத் துண்டுகள் சில அபயகிரிய மற்றும் அனுராதபுர அகழ்வாய்வுகளில் கண்டுபிடிக்கப்பட்டன. சுமார் பன்னிரண்டு நூற்றாண்டுகளாக பூமியில் புதைந்து இருந்தபோதிலும், வெள்ளைப் பின்னணியில் தங்கம், ஆரஞ்சு, சிவப்பு மற்றும் பச்சை வண்ணங்களில் வடிவமைப்புகளைக் காட்டும் பளபளப்பான மேற்பரப்பை அவை இன்னும் தக்கவைத்துக் கொண்டுள்ளன. ஒரே வண்ணமுடைய வடிவமைப்புகளின் ஆரம்ப எடுத்துக்காட்டுகள் எகிப்தில் காணப்படுகின்றன (Mughal, Mohammad Rafique, 1990). அங்கு கண்ணாடியை அலங்கரிக்க இந்த நுட்பம் முதன்முதலில் பயன்படுத்தப்பட்டது.  ஈராக்கில், 9 ஆம் நூற்றாண்டின் இறுதி வரை பாலிக்ரோம் (polychrome) வடிவமைப்புகள் தொடர்ந்தும் தயாரிக்கப்பட்டன. அதே நேரத்தில் ஈரானில், மனித, விலங்கு மற்றும் பறவை வடிவமைப்புகளுடன் கூடிய பளபளப்பான மெருகூட்டப்பட்ட மட்பாண்டங்களுக்கு பெரும் கிராக்கி இருந்து வந்தது.

முடிவுரை

இஸ்லாமிய மட்பாண்டங்கள் இலங்கையில் முஸ்லிம்களின் இருப்பு மற்றும் செல்வாக்கு பற்றிய மதிப்புமிக்க தொல்பொருள் பதிவுகளை வழங்குகின்றன. முஸ்லீம் குடியேற்றங்கள், வர்த்தகத் தொடர்புகள் மற்றும் ஏனைய சமூகங்களுடனான உறவுகளையும் அவை எடுத்துக்காட்டுகின்றன. இலங்கையின் இஸ்லாமியப் பாரம்பரியத்தை பிரதிபலிக்கும் கலாசாரக் கலைப்பொருட்களாகவும் இஸ்லாமிய மட்பாண்டங்கள் உள்ளன. இந்தக் கட்டுரை, இலங்கையின் அனுதாரபுர தொல்பொருள் நூதனசாலை, அபயகிரிய நுதனசாலை, யாழ்ப்பாணப் பல்கலைக்கழக நூதனசாலை, இலங்கை தேசிய நூதனசாலை, காலி சமுத்திரவியல் நூதனசாலைகளில் உள்ள இஸ்லாமிய மட்பாண்டங்களைப் பகுப்பாய்வு செய்து எழுதப்பட்டுள்ளது.  இலங்கைக்கு வெளியே உள்ள பகுதிகளிலிருந்து கிடைத்த ஒப்பீட்டு உதாரணங்கள் இயன்றளவு வழங்கப்பட்டுள்ளன.

இலங்கைக்கும் பிற இந்தியப் பெருங்கடல் கலாசாரங்களுக்கும், இலங்கையுடன் வர்த்தகம் செய்யும் பிற இடங்களுக்கும் இடையிலான தொடர்புகளைப் புரிந்துகொள்வது இந்தக் கட்டுரையின் நோக்கமாகும். இலங்கைக்கும் இஸ்லாமிய உலகிற்கும் இடையிலான கப்பல் போக்குவரத்து மற்றும் வர்த்தகத் தொடர்புகளைப் புரிந்துகொள்வதற்கு இஸ்லாமிய மட்பாண்டங்கள் குறித்த தெளிவு அவசியமாகும். சாசானிய, இஸ்லாமிய மற்றும் சீன வணிகர்கள் இலங்கையின் இஸ்லாமிய மட்பாண்டங்களில் செலுத்திய செல்வாக்கு, வெளிநாட்டுப் படையெடுப்பாளர்கள் மற்றும் வர்த்தகர்கள் குறித்த தகவல்களை வழங்குகிறது. இவை, இலங்கையில் முஸ்லிம் குடிப்பரம்பல் குறித்து அறிந்து கொள்ளும் முக்கியமான தடயங்களாகக் காணப்படுகின்றன. இவை இலங்கையின் வளமான மற்றும் பன்முக கலாசார பாரம்பரியத்திற்கு சான்றுகளாகவும் அமைகின்றன. மேலும் நாட்டின் வரலாறு, கலாசாரத்தை வடிவமைப்பதில் இஸ்லாம் வகித்த முக்கியத்துவத்தையும் இவை எடுத்துக்காட்டுகின்றன. இலங்கையில் இஸ்லாமிய மட்பாண்டங்களின் தொல்பொருள் பங்கு குறித்து கவனம் செலுத்தவேண்டியுள்ளது.

உசாத்துணை

1. De Silva, N., & Dissanayake, R. B. (2008). A catalogue of ancient pottery from Sri Lanka. Postgraduate Institute of Archaeology (University of Kelaniya).
2. Ghafur, Muhammad Abdul (1966). “Fourteen Kufic Inscriptions of Banbhore: The Site of Daybul, Pakistan Archaeology.” Karachi, Number 3: 65–90.
3. Mughal, Mohammad Rafique (1986). “The Islamic Glasswares from Banbhore, Pakistan Pictorial.” Islamabad, Volume X (93): 56–59.
4. Mughal, Mohammad Rafique (1990). “The Sgraffiato Pottery in the Lahore Museum.” Lahore Museum Bulletin, III (1). Islamabad: 55–61.
5. Mughal, Mohammad Rafique (1992). “Early Muslim Cities in Sindh and Patterns of International Trade.” Islamic Studies. Occasional Papers 11. Islamabad: Islamic Research Institute, International Islamic University.
6. Mughal, Mohammad Rafique (1998). “The Archaeology of Sindh (since 1930).” Supplement to the Antiquities of Sind. Third Edition. Karachi: Department of Culture and Tourism, Government of Sindh: 155–208.
7. Wijayapala, W., & Brickett, M. E. (1986). Sri Lanka and International Trade. Colombo.