பால. சிவகடாட்சம்
மருத்துவ நூல்களைத் தமிழில் ஆக்கும் முயற்சிகள் மிகவும் பிற்காலத்திலேயே மேற்கொள்ளப்பட்டன. இவற்றுள் குறிப்பிடத்தக்கவை யாழ்ப்பாண இராச்சியத்தை ஆண்டுவந்த ஆரியச் சக்கரவர்த்திகள் பரம்பரையினரால் பொது ஆண்டு 1500க்குச் சமீபமாக ஆக்கப்பெற்ற செகராசசேகரம் என்னும் நூலும் அதனை மேலும் விரிவுபடுத்தி எழுதப்பெற்ற பரராசசேகரம் என்னும் பன்னிரண்டு பாகங்கள் கொண்ட நூலும் ஆகும்.
இவற்றுள் பரராசசேகரம் என்னும் நூலுக்குரியதாகக் கருதப்படும் பாடங்களுள் பெரும்பாலானவை கிடைத்துள்ள போதிலும் செகராசசேகரத்துக்கு உரிய பாடங்கள் இன்னமும் முழுமையாக வெளிவரவில்லை. இவற்றுள் ஒன்றுதான் மருந்தாகப் பயன்படும் பதார்த்தங்களின் குணங்கள் பற்றி எடுத்துரைக்கும் இரசவர்க்கம் என்னும் நூலாகும். ‘செகராசசேகரத்துக்குரிய இரசவர்க்கம்’ என்னும் பகுதியைக் கொண்ட ஏட்டுப்பிரதி பாரம்பரிய மருத்துவர்களான எமது மூதாதையரிடம் இருந்து எமக்கு வந்துசேர்ந்துள்ளது. இதனை முதன்முதலாக அச்சில் வெளிக்கொண்டுவரும் வாய்ப்பு எமக்குக் கிடைத்திருப்பதையிட்டு நாம் பெருமகிழ்வு அடைகிறோம்.
சமஸ்கிருத மொழியில் ஆக்கபெற்ற பண்டைய ஆயுள்வேத மருத்துவ நூல்களைப் பிராமணர், சத்திரியர், வைசியர் என்போரே படித்துப் பயன்பெற முடிந்தது. இவர்களே ஆயுள்வேத மருத்துவர்களாகப் பணிபுரிய முடிந்தது. குயவர், நாவிதர் முதலானோர் கழலை கட்டி அரிதல், புண்புரைகளுக்கு மருந்து கட்டுதல், எலும்பு முறிவுக்குக் கட்டுப்போடுதல் போன்ற சிகிச்சைகளைச் செய்துவந்தனர்.
சித்தர்கள் கண்டறிந்த மருத்துவமுறைகள் நெடுங்காலமாக எழுதப்படாது வாய்மொழி மரபாகவே பேணப்பட்டு வந்துள்ளன. பல நூற்றாண்டு காலமாக சமஸ்கிருத மொழியில் பயிலப்பட்டு வந்த ஆயுள்வேத மருத்துவ நூல்களைத் தமிழில் ஆக்கும் முயற்சிகள் மிகவும் பிற்காலத்திலேயே மேற்கொள்ளப்பட்டன. இவற்றுள் குறிப்பிடத்தக்கவை யாழ்ப்பாண இராச்சியத்தை ஆண்டுவந்த ஆரியச் சக்கரவர்த்திகள் பரம்பரையினரால் பொது ஆண்டு 1500க்குச் சமீபமாக ஆக்கப்பெற்ற செகராசசேகரம் என்னும் நூலும் அதனை மேலும் விரிவுபடுத்தி எழுதப்பெற்ற பரராசசேகரம் என்னும் பன்னிரண்டு பாகங்கள் கொண்ட நூலும் ஆகும்.
இவற்றுள் பரராசசேகரம் என்னும் நூலுக்குரியதாகக் கருதப்படும் பாடங்களுள் பெரும்பாலானவை கிடைத்துள்ள போதிலும் செகராசசேகரத்துக்கு உரிய பாடங்கள் இன்னமும் முழுமையாக வெளிவரவில்லை. இவற்றுள் ஒன்றுதான் மருந்தாகப் பயன்படும் பதார்த்தங்களின் குணங்கள் பற்றி எடுத்துரைக்கும் இரசவர்க்கம் என்னும் நூலாகும். பிற்காலத்தில் இந்தியாவில் வெளியிடப்பெற்ற பதார்த்தகுண சிந்தாமணி மற்றும் இலங்கையில் ஆக்கப்பெற்ற பதார்த்த சூடாமணி என்னும் நூல்களுக்கு முன்னோடியாகத் திகழ்ந்தது இந்நூல்.
செகராசசேகரத்துக்குரிய இரசவர்க்கம் இன்னமும் முழுமையாகக் கிடைக்கவில்லையாயினும் கிடைத்த பாடல்களை அவற்றுக்கான உரையுடனும் அம்மருந்துப் பொருட்கள் பற்றித் தற்போது கிடைக்கும் மேலதிக விவரங்களுடனும் வெளியிடத் தீர்மானித்தோம். அவ்வகையில் தமிழ்மக்கள் பலருக்கும் பயன்படும் வண்ணம் இந்நூலினைப் பதிப்பித்து வெளியிடும் எழுநா இதழ் குழுவினருக்கு நன்றிகூறக் கடமைப்பட்டுள்ளேன். குறிப்பாக இந்நூலாக்க முயற்சியில் அதிக ஆர்வம் காட்டிச் செயற்பட்ட எழுநா ஆசிரியர் குழுவைச் சேர்ந்த செல்வி பவித்ரா மாயழகு அவர்கட்கு எனது நன்றியும் பாராட்டுகளும்.
மார்ச் 2023
முனைவர் பால. சிவகடாட்சம்
B.Sc., Hons (Peradeniya),
D.I.C, B.Ed., (Toronto), Ph.D., (London)
முன்னாள் சிரேட்ட விரிவுரையாளர், துறைத்தலைவர்,
விவசாய உயிரியல்பீடம்,
யாழ்ப்பாணப் பல்கலைக்கழகம்.
சிங்கைச் செகராஜசேகரன் என்ற பெயருடன் நல்லூரைத் தலைநகராகக் கொண்டு யாழ்ப்பாண இராச்சியத்தை ஆண்ட மன்னன் ஒருவன் தனது குடிமக்களுள் பெரும்பாலான தமிழ்மக்களின் நலன் கருதி வைத்தியம் மற்றும் சோதிடம் தொடர்பான நூல்களைத் தமிழ்மொழியில் ஆக்கும்படி இந்தியாவில் இருந்து தான் வரவழைத்த பண்டிதர்களைக் கேட்டுக் கொண்டான். இப்பொழுது எமக்குக் கிடைக்கும் செகராசசேகரமாலை என்னும் சோதிட நூலும் செகராசசேகரம் என்னும் வைத்திய நூலும் இம்மன்னன் காலத்தில் ஆக்கப் பெற்றனவே. கி.பி.
15 ஆம் நூற்றாண்டின் இறுதியில் அல்லது 16 ஆம் நூற்றாண்டின் முற்பகுதியில் செகராஜசேகரன் என்னும் பெயருடன் நல்லூரில் இருந்து ஆட்சிசெய்த மன்னன் ஒருவனே மேற்படி நூல்கள் தோன்றக் காரணமாயிருந்தான் என்பதற்கான வரலாற்றுச் சான்றுகள் உள்ளன. செகராசசேகரம் என்னும் மருத்துவ நூலின் ஒரு சில பாகங்களே அச்சில் வெளிவந்துள்ளன. செகராசசேகர வைத்தியத் திறவுகோல் என்னும் பெயரில் இலங்கை ஆயுள்வேதத் திணைக்களத்தின் வெளியீடாக மீள்பதிப்புச் செய்யப்பட்டுள்ள இந்நூலுக்கு உரை எழுதியுள்ள வைத்திய கலாநிதி நாகரத்தினம் கணேசலிங்கநாதன் தனது முகவுரையில் பின்வருமாறு குறிப்பிடுகிறார்.
''செகராசசேகரத்தின் சில பகுதிகள் நூல் உருப்பெறவில்லை. இரசவர்க்கம், பாலர்நோய் மருத்துவம், மனநிலை பிறழ்வு மருத்துவம் போன்றவை இதில் அடங்கும். இவை ஏட்டுப் பிரதிகளில் பாரம்பரிய மருத்துவர்களிடம் இருக்கலாம் அல்லது சிதைந்து இருக்கலாம்."
அதிர்ஷ்டவசமாக கணேசலிங்கநாதன் குறிப்பிட்டுள்ள 'செகராசசேகரத்துக்குரிய இரசவர்க்கம்' என்னும் பகுதியைக் கொண்ட ஏட்டுப்பிரதி பாரம்பரிய மருத்துவர்களான எமது மூதாதையரிடம் இருந்து எமக்கு வந்துசேர்ந்துள்ளது.
இதனை முதன்முதலாக அச்சில் வெளிக்கொண்டு வரும் வாய்ப்பு எமக்குக் கிடைத்திருப்பதையிட்டு நாம் பெருமகிழ்வு அடைகிறோம். உடலுக்கு ஆரோக்கியத்தையும் நீண்ட ஆயுளையும் கொடுக்கும் மருந்துப் பொருள்களின் குணங்களை எடுத்துரைக்கும் இந்தப் பகுதி வெண்பாக்களால் ஆனது. இப்பாடல்கள் ஒவ்வொன்றினதும் விளக்கத்தையும் மருந்துப்பொருள் பற்றிய மேலதிக விவரங்களையும் தந்துள்ளோம்.
நூற்று எட்டுப் பாடல்கள் மாத்திரமே எமக்குக் கிடைத்த ஏட்டுச் சுவடிகளில் காணப்படுகின்றன. இந்தப் பாடல்களில் ஒருசில இந்தியாவில் 1932 இல் அச்சிட்டு வெளியிடப்பட்ட ‘பதார்த்தகுண சிந்தாமணி' என்னும் நூலில் சிற்சில மாறுதல்களுடன் இடம்பெற்றுள்ளன. அவற்றையும் பாடபேதமாகக் குறிப்பிட்டுள்ளோம்.